GAP vë në dyshim vendimet e fundit të qeverisë

Instituti për Studime të Avancuara (GAP), ka vlerësuar se Qeveria në dorëheqje, nuk ka të drejtë të marrë vendime ekzekutive, por vetëm të zbatojë ato që janë marrë para miratimit të mocionit të mosbesimit.
“Tri ditë pas aprovimit të mocionit të mosbesimit, Qeveria ka mbajtur mbledhjen e saj të rregullt dhe ka marrë tetë vendime ekzekutive. Dokumentet ligjore në fuqi, si Kushtetuta, Rregullorja e Punës së Qeverisë dhe Rregullorja e Punës së Kuvendit nuk e parashohin askund se a ka të drejtë apo jo që një qeveri në dorëheqje të marrë vendime ekzekutive. Dhe kjo është një zbrazëtirë ligjore e cila do të duhej të mbulohej me Rregullore të Punës së Qeverisë apo Ligjin e ardhshëm mbi Qeverinë”, thuhet në një komunikatë për media të GAP-it.

“Qeveria, të cilës i është marrë mandati nga Kuvendi i Kosovës, nuk ka legjitimitet që të marrë vendime ekzekutive, por si Qeveri në dorëheqje e gëzon të drejtën vetëm të zbatimit të vendimeve që janë marrë para miratimit të mocionit të mosbesimit”.