Tentohet që Daci të eliminohet nga jeta politike

Procesin gjyqësor ndaj liderit të Lidhjes Demokratike të Dardanisë, Nexhat Daci dhe vendimi i Gjykatës në lidhje me ‘rastin Daci’, është përpjekje për eliminimin e tij nga jeta politike në Kosovë- ka thënë në një intervistë për Radion Evropa e Lirë, nënkryetari i LDD-së, Naser Rugova.
“Mbase ky proces politik që zgjati pothuajse katër vjet, me këtë konotacion dhe me një aktgjykim të tillë çfarë mori vendim trupi gjykues, vërtet hap shumë dilema. A po sundon rendi dhe ligji në këtë vend, a po ndikohet dhe a po bëhet presion enorm mbi Gjyqësorin në Kosovë, ku në njëfarë forme tentohet që akademik Daci të eliminohet nga jeta politike në Kosovë, lë shumë dilema hapur”, është shprehur Rugova.

Sipas tij, rendi dhe ligji në Kosovë janë të rrezikuar seriozisht dhe Gjyqësori po dhunohet nga politika, ndërkaq i ka bërë ftesë misionit EULEX që ta bëjë punën e vet.

Duke komentuar porosinë e zëvendësshefit të EULEX-it, Andrew Sparkes, që njerëzit të cilët janë subjekt i ndonjë procesi hetimor apo gjyqësor, të mos jenë në listat zgjedhore, Rugova thotë se EULEX-i nuk duhet të paralajmërojë, por ta ndihmojë shtetin e ri të Kosovës “në krijimin e një shteti ligjor, në ndërtimin e një Gjyqësori të pavarur, që është bazë, gur-themel, fundament i ndërtimit të një shteti demokratik dhe një shoqërie demokratike”.