Gjermanët lavdërojnë Vettelin

Berlin, 15 nëntor – Një ditë pasi që Sebastian Vetteli u bë kampioni më i ri i Formula 1 në histori, mediet në vendin e tij, në Gjermani, kanë thurur lëvdata të shumta për të.

Vettel me triumfin në Abu Dhabi njëkohësisht është bërë vetëm gjermani i dytë, kampion i Formula 1, pasi që para tij këtë e ka arritur Michael Schumaher, madje shtatë herë.

“Bild” tërë faqen e parë ia ka kushtuar Vettelit me titullin “Vetteli është mbret” dhe fjalët “Pas Shumit, Gjermania ka heroin e Formula 1”.

Edhe gazetat e tjera e kanë rezervuar faqen e parë për heroin e ri gjerman. “Allgemeine Zeitung” e Frankfurtit ka njoftuar se vozitësi i ri i Red Bullit është shumë i popullarizuar edhe jashtë Gjermanisë.

“Sueddeutsche Zeitung” shkruan “Titulli i kampionit botëror për Vettelin”. Në veçanti në fazat e fundit të kampionatit ka demonstruar kualitetet e tij më të spikatura – talentin, vendosmërinë dhe fuqinë.

Edhe mediet jashtë Gjermanisë, po kështu kanë lavdëruar kampionin e ri të Formula 1. “Me 10 pole position dhe 5 triumfe gjatë sezonit, 23-vjeçari gjerman e ka merituar titullin në finalen e madhe”, shkruan “Guardian”-i britanik.

Tabloidi “Sun” ka shkruar se fitorja e Vettelit është epilog i jashtëzakonshëm, i cili ka shpëtuar Formula 1 nga turpi.

“Titulli për Vettelin është fitore e Fair Play-it dhe ka penguar që Alonso të promovohet pa meritë kampion, pasi që Felipe Massës i është urdhëruar që t’ia falë fitoren dhe 7 poena plus në Gjermani”, thotë “Sun”.

Fjalë miradije dhe lavdërime kanë thurur sot edhe gazetat franceze “La Figaro”, “L'Equipe”, dhe ato italiane “La Gazzetta dello Sport”, “Tuttosport” dhe “Corriere della Sera”.