Edita ia ndryshon listën PDK-së

Prishtinë, 17 nëntor - Lista e PDK-së nuk është përfundimtare dhe pritet të ndryshojë deri në afatin e fundit, shkruan sot “Express”. Kryetarja e ADK-së, Edita Tahiri ka ripërtërirë marrëveshjen me PDK-në dhe do të jetë pjesë e listës. Këtë nuk e ka bërë edhe Gjergj Dedaj, por ai shpreson se do të jetë pjesë e Qeverisë së ardhshme.
Një listë me kandidatë për deputetë nga Partia Demokratike e Kosovës, e cila u publikua të hënën, nuk është ende përfundimtare.Kështu kanë bërë të ditur zyrtarë të kësaj partie, të cilat kanë thënë se lista do të jetë objekt i ndryshimeve deri në afatin e fundit të përcaktuar nga KQZ-ja, që është dita e enjte.
Në këtë listë nuk ka figuruar emri i Edita Tahirit, ministre në dorëheqje e Administratës Publike. Kjo edhe ka shtyrë Tahirin që ta kontaktojë kreun e PDK-së, Hashim Thaçi, për të kërkuar sqarime.
Tahiri, e cila udhëheq një parti të vogël, ADK-në, kishte garuar në Listën Zgjedhore të PDK-së në zgjedhjet e vitit 2007.

Sipas Tahirit, Thaçi ka konfirmuar se marrëveshja e tyre do të vazhdojë.

“Kemi biseduar edhe në fakt gjithçka është në rregull sipas marrëveshjes që ADK-ja do të ketë përfaqësimin në listë, unë vetë do të jem e përfaqësuar, edhe sigurisht një ose dy kandidatë të tjerë”, ka thënë Tahiri, për Express, të martën.

“Sa i takon listës që ka dalë, unë duke marrë informacionin nga mediat, kontaktova me z. Thaçi dhe u rikonfirmua që jemi në koalicion. Se si është lansuar kjo listë në media, nuk e kam pyetur, duke qenë se afati i dorëzimit të plotë është këtë të enjte”, ka thënë Tahiri.