Themeluesi i Apple: Android do të dominojë në treg

Themeluesi i Apple, Steve Wozniak është deklaruar për gazetën holandeze, De Telegraaf. Zbulimin e parë që ai e bëri në këtë intervistë, ishte se Apple në të kaluarën ka bashkëpunuar me një kompani japoneze në vitin 2004, me qëllim të krijimit të një telefoni të avancuar që do ishte sensacion i asaj kohe.
Steve i dytë i kësaj kompanie, gjithashtu ka thënë se qëllimi i këtij bashkëpunimi ishte që të krijojnë një telefon që “do ta mahniste botën”, mirëpo siç e dimë kjo nuk ka ndodhur atëherë, deri në momentin kur Apple ka lansuar telefonin e mençur, iPhone në janar të vitit 2007.

Mirëpo, deklaratat e njërit prej themeluesve të Apple nuk kanë përfunduar me kaq. Ai gjithashtu është deklaruar edhe për platformat mobile që ekzistojnë sot në treg, duke thënë se Android dhe jo iOS do të dominojnë tregun e telefonave mobil në botë. Madje, ai e krahason Androidin me Microsoft, i cili edhe sot dominon me kompjuterët personal në botë.

Lidhur me iPhone dhe Android, Wozniak ka thënë: “iPhone nuk ka probleme. Në aspektin e kualitetit, ky telefon udhëheq sot në treg. Mirëpo, telefonat e bazuar në Android kanë më shumë funksione. Ata ofrojnë më shumë zgjidhje për njerëzit”.