Dell më mirë sesa që është pritur

Dell (jo Ambasadori amerikan në Kosovë, por kompania e njohur teknologjike amerikane) në tremujorin e tretë ka pasur profit më të mirë sesa që ishte pritur. Në anën tjetër, të hyrat kanë qenë diç më të ulëta.
Më konkretisht, kompania ka pasur të hyra me vlerë prej 15.4 miliardë dollarë që është për 19 për qind më mirë sesa në tremujorin e mëhershëm. Profiti ka qenë 822 milionë dollarë që i bie për madje 144 për qind më mirë sesa në periudhën e njëjtë të vitit të kaluar.

Më së shumti janë rritur të hyrat nga shitjet në sektorin komercial, për 27 për qind, derisa shitja në segmentin shpenzues është rritur për gjithsej 4 për qind.

Kryeshefi ekzekutiv i kompanisë ka deklaruar se Dell ka për qëllim që të rrisë investimet në zhvillimin e produkteve komerciale, para së gjithash ofruesve, sistemeve për ruajtje të dhënave, zgjidhjeve për rrjet, si dhe shërbimeve.