Premtime me thasë

Afrimi i ditës së zgjedhjeve, por edhe rezultatet e sondazheve të fundit, kanë nxitur një fazë të re premtimesh elektorale nga udhëheqësit e partive kryesore, të cilat i tejkalojnë të gjitha mundësitë e realizimit në mandatin e ardhshëm.
Dy ditë e fundit të fushatës janë dominuar nga premtime të tilla të ekzagjeruara, duke filluar që nga aspektet madhore që lidhen, me ndryshime kufijsh të shteteve, e deri te aspektet e brendshme ekonomike a buxhetore, shkruan gazeta Zëri.

Një pjesë e madhe e këtyre premtimeve, përveç se të parealizueshme, tingëllojnë qesharake dhe fyese për pjesë të caktuara të elektoratit. Gara për premtimin e gjithçkaje, me qëllim të maksimalizimit të votave në këtë, nga analistët politikë konsiderohet karakteristikë e partive kryesore, të cilat vuajnë nga mungesa e programeve të qëndrueshme, por edhe profili politik.

Analisti Armand Shkullaku ka thënë se premtimet e ekzagjeruara po e karakterizojnë këtë fushatë elektorale që nga fillimi.

Sipas tij, një gjë e tillë nuk është e natyrshme, pasi që partitë çdo premtim që e japin, duhet ta mbështesin në programin elektoral, së bashku me argumentet e bazuara dhe një varg arsyetimesh që do të bindin votuesit se ato do të mbahen.

“Elektorati bën diskualifikimet dhe e kupton se deri ku mund të shkojë raporti mes realitetit dhe sureales, pasi që këto parit shpesh po japin edhe premtime sureale”, tha Shkullaku, duke shtuar se disa prej këtyre premtimeve janë edhe qesharake.

Kurse, Avni Zogiani nga organizata “Çohu” i konsideron gracka elektorale të gjitha premtimet e partive politike, të cilat nuk janë të paraqitura në programet e tyre. Sipas tij, me këto premtime liderët e subjekteve përkatëse po përpiqen të maksimalizojnë numrin e votave, edhe pse e dinë se ato nuk do të mbahen në rast të marres së mandatit qeverisës.