Rëntgeni i Albert Einsteinit shitet për 38 750 dollarë

Londër, 6 dhjetor - Julien's Auctions kanë organizuar shitjen e sendeve që dikur i kanë takuar të famshmëve.

Midis tyre ishte kapela dhe dorëzat e mbretit të ndjerë të popit, Michael Jackson, të cilat janë shitur për mbi 400 mijë dollarë, përkatësisht dorëza është shitur për 330 mijë dollarë, ndërsa kapela për 72 mijë dollarë.

Përveç sendeve të mbretit legjendar të popit, janë shitur edhe incizimi me rëntgen i trurit të Albert Einsteinit dhe shishja e zbrazët e pilulave të Marilyn Monroes.

Incizimi me rëntgen është shitur për 38 750 dollarë, ndërsa shishja e Monroes për 19 mijë dollarë. Dihet se aktorja ka marrë mbidozë me pilulat dhe në këtë mënyrë është vetëvrarë.