Valdano: Ronaldo është bekim për Realin

Menaxheri gjeneral i Real Madridit, Jorge Valdano, beson se anësori Cristiano Ronaldo është ‘bekim’ për klubin, pasi portugezi shënoi hat-trick në fitoren 4-2 ndaj Villarrealit.

“Cristiano është një bekim për Real Madridin. Ai nuk ndryshon për askënd, ai na jep neve shumë dhe ju nuk mund të kërkoni më shumë. Kur ekipit i duhet energji, ai është aty për t’ia dhënë”, ka thënë Valdano.

Së fundi, agjenti i Cristiano Ronaldos tha se klienti i tij do ta tejkalojë yllin e Barcelonës, Lionel Messi, dhe do të bëhet lojtari më i mirë që ka ekzistuar ndonjëherë në futboll.

“Cristiano është lojtari më i mirë në botë. Jo Messi? Përfundimisht jo. Lojtarët do të dëshmojnë se unë kam të drejtë, me kalimin e kohës. Cristiano do të shihet si më i madhi i të gjitha kohërave”.

“Messi është një lojtar i shkëlqyeshëm, nuk kam dyshime. Por dëshira, karakteri dhe kualiteti i Cristianos dallojnë nga të tjerët, dhe tash ai bashkohet nga fakti se është duke punuar me trajnerin më të mirë në botë të të gjitha kohërave (Jose Mourinho)”, ka thënë së fundi Mendes.