Mini-dhomat hoteliere në Kinë

Shangai, 20 janar- Kina, shteti me mbi 1.3 miliardë banorë, për shkak të rritjes së madhe të udhëtimeve turistike, ka filluar të marrë shembull nga Japonia dhe po aplikon të ashtuquajturat kapsolla hoteli. Një hotel i tillë me standarde ndërkombëtare është hapur në qytetin e dytë më të madh kinez, në Shangai.
“Kapsolla e parë kineze” do të jetë e gatshme për pranimin e mysafirëve për vitin e ri kinez (i cili fillon më 3 shkurt dhe do të jetë në shenjën e lepurit), pra në kohën kur më shumë se 100 milionë njerëz udhëtojnë nëpër mbarë vendin për të kremtuar me familjet e veta.
Hoteli ka 68 kapsolla, dhoma të vogla, me madhësi të një dollapi. Ato janë importuar nga japonia, e cila ka filluar e para të ndërtojë këso bujtinash të lira turistike, por që deri tashti i kanë kopjuar në goxha shumë shtete të botës.
Secila nga mini-dhomat ka prizën e vet elektrike, orën, dritën ndriçuese, televizorin dhe internetin pa tel. Pronari i hotelit, i cili gjendet afër stacionit hekurudhor në Shangai, është një 33 vjeçar, i cili ka banuar në mini-dhoma të tilla gjatë punës dhe qëndrimit të tij në Japoni. Për fjetje, përkatësisht qëndrimin 10 orësh, fjetja kushton 7.42 euro, kurse për qëndrim 24 orësh rreth 10 euro, gjë që në krahasim me hotelet tjera të lira në Shangai paraqet çmim të volitshëm.
Vitin e kaluar Kina ka qenë nikoqir i ekspozitës botërore, dhe sipas informatave të para këtë vend më 2010 e kanë vizituar 2.1 miliardë turistë vendës e të huaj. Në krahasim me vitin 2009, kjo paraqet rritje të qarkullimit turistik prej 12 për qind.