Krasniqi diplomatëve të huaj: Kosovën e presin shumë sfida

Prishtinë, 28 janar – Ushtruesi i detyrës së presidentit të vendit, Jakup Krasniqi organizoi sonte pritjen tradicionale për korin diplomatik të akredituar në Prishtinë.
Duke iu drejtuar diplomatëve të huaj me mision në Kosovë, Krasniqi tha se viti 2010 i solli Kosovës një varg të arriturash, që bashkë me ato të viteve të tjera përbëjnë një bazë të mirë për perspektivën e saj të sigurt. Me këtë rast ai veçoi vendimin e GJND-së për shpalljen e pavarësisë së vendit për akt legjitim dhe në përputhje me të drejtën ndërkombëtare.
Duke i bërë një vështrim procesit zgjedhor të filluar më 12 dhjetor dhe ende të papërfunduar me certifikim të rezultateve, presidenti në detyrë tha se ai proces “po shkon drejt finalizimit të suksesshëm, duke përmirësuar parregullsitë e evidentuara dhe duke kthyer besimin e subjekteve politike, të elektoratit dhe të vëzhguesve të shumtë”.
“Presim që shumë shpejt, sipas rezultateve të certifikuara të zgjedhjeve të përgjithshme, të ndërtojmë institucionet përfaqësuese e ekzekutive dhe të konsolidojmë sistemin tonë demokratik”, tha Krasniqi.
Duke përmendur sfidat që e presin vendin sivjet, ai tha se vështirësive të ndryshme me të cilat ballafaqohet një shtet i ri, tash i është shtuar edhe një e papritur, “raporti famoz i z. Dick Mary, pretendimet e të cilit duhet të hetohen dhe të zbardhen sa më parë nga drejtësia, për të mos mbetur peng i tyre imazhi ndërkombëtar i Kosovës”.
Sipas Krasniqit, programi dhe prioritetet strategjike të Kosovës janë të qarta për cilëndo qeveri dhe për institucionet tjera, për shoqërinë civile dhe për gjithë qytetarët: zhvillimi ekonomik e shoqëror dhe sundimi i plotë i ligjit e qeverisja e mirë, forcimi i stabilitetit politik dhe i sigurisë, reformat e gjithanshme demokratike dhe forcimi i pozitës ndërkombëtare, shtimi i njohjeve të pavarësisë dhe anëtarësimi në organizmat ndërkombëtarë, duke përfshirë OKB-në, përmbushja e standardeve dhe kritereve, që vendi ynë të shënojë progres drejt liberalizimit të vizave e të integrimeve euroatlantike, tha pos tjerash Krasniqi në pritjen e organizuar për trupin diplomatik të akredituar në Kosovë.