FER: Nuk ka kurrfarë negociatash

Partia Fryma e Re përmes një deklarate për media theksoi se pohimet e një të përditshme kosovare për gjoja negociatat dhe hyrjen e FER-it në qeveri me Partinë Demokratike të Kosovës nuk janë të vërteta.

Në reagimin e FER-it ndaj shkrimit “FER-i në Qeveri me Thaçin” të gazetës Zëri thuhet se FER nuk ka zhvilluar e as nuk po zhvillon kurrfarë negociate në këtë drejtim.

“Partia FER dëshiron ta njoftoj opinionin e gjerë se ashtu siç është konstatuar në mbledhjen e fundit të Këshillit Drejtues të kësaj partie, FER e konsideron procesin zgjedhor të datës 12 dhjetor 2010, dhe rivotimet vijuese, si një proces të dëmtuar rëndë. Institucionet e dala nga këto zgjedhje do të kenë një barrë të rëndë të mungesës së legjitimitetit për shkak të parregullsive të shumta...”, thuhet në reagim.

Më tej, kjo parti vlerëson se Kosova gjendet në krizën më të madhe institucionale, politike e sociale që nga viti 1999. “Të flitet tani për koalicione të brishta në mes të disa partive e individëve është ikje nga përgjegjësia dhe realiteti. Cilido institucion që del nga këto zgjedhje duhet ta ketë si mandat kryesor organizimin e zgjedhjeve të reja, të lira
dhe demokratike”.

Sipas kësaj partie, përkundër mohimeve të zyrtarëve të partisë FER për negociata, artikulli paraqitet me titullin pompoz dhe pohues se FER-i ka hyrë në qeveri, pa
dhënë as të vetmen shenjë se FER-i në mënyrë kategorike e ka mohuar.

“Si gjithmonë, FER-i zotohet për liri të të shprehurit por edhe për transparence. Për çdo vendim të partisë, mediat do të jenë të njoftuara me kohë”, thuhet në reagim