Internet në ajër

Berlin, 1 mars - Deutsche Telekom ka bërë të ditur se në bashkëpunim me kompanitë Lufthansa dhe Panasonic Avionics ka zgjeruar me sukses shërbimin për qasje në Internet edhe në avionë.
Shërbimi i quajtur FlyNet u mundëson shfrytëzuesve qasje të pakufizuar në Internet gjatë fluturimit përmes rrjetit WiFi brenda avionëve (zhvillohet tashmë dhjetë vjet dhe në fluturime të caktuara ishte në disponim edhe më parë). Lidhja me Internetin bëhet përmes satelitëve, ndërsa shfrytëzuesve u mundësohet shpejtësi e bartjes së të dhënave prej 5 Mbit/s.
Për parapaguesit e Deutsche Telekom çmimi i qasjes është 1,79 euro për 10 minuta shfrytëzim, ndërsa të tjerët duhet të paguajnë përmes kartelave të kreditit, përmes operatorëve të tyre të telekomunikimit ose nëse kanë ndonjë kontratë për WiFi roaming me Deutsche Telekom apo duke shfrytëzuar miljet shpërblyese nga programi Miles & More. Çmimi standard përmes kartës së kreditit është 10,95 euro për një orë, gjegjësisht 19.95 euro për 24 orë të cilat shfrytëzuesit mund t’i përdorin edhe në fluturimet tjera të Lufthansës të cilat përkrahin FlyNet si dhe në sallonet e Lufthansës në aeroporte.
FlyNet tani për tani është në disponim në disa fluturime të përzgjedhura të Lufthansa përtej Atlantikut, ndërsa deri në fund të këtij viti do të duhej të ishte në disponim pothuajse në të gjitha fluturimet e Lufthansa në relacione të gjata.