Frutat arrore mbrojnë zemrën, parandalojnë karcinomat

Londër, 4 mars - Frutat arrore mund të zvogëlojnë rrezikun nga zhvillimi i sëmundjeve të zemrës dhe të kancerit, thonë hulumtuesit. Studimi i ri ka treguar që antioksidantët e tyre natyrore ndihmojnë edhe në zvogëlimin e pezmatimeve në arterie.
Veçanërisht janë të pasura me një formë të antioksidantëve të vitaminës E, me emrin gama-tokoferol, ndërsa hulumtimi ka treguar që niveli i tyre në trup dyfishohet madje vetëm tetë orë pas konsumimit të këtyre frutave.
Shkencëtarët kanë analizuar 16 meshkuj dhe femra të cilët kanë ngrënë fruta arrore. U kanë dhënë tri shujta të ndryshme, një ka përfshirë vetëm frutat arrore, tjetri edhe ujin, ndërsa i treti ka qenë neutral. Për vetëm tri orë te vullnetarët të cilët kanë ngrënë vetëm fruta arrore, ka rënë për një të tretën oksidimi i pashëndetshëm i kolesterolit “të keq” në gjak, çka mund të shkaktojë probleme me zemër.
“Hulumtimet e mëhershme kanë treguar që arrat dhe frutat e tjera arrore përmbajnë faktorë antioksidantë. Hulumtimi ynë tregon që këto antioksidante me të vërtetë absorbohen në trup dhe japin efektin mbrojtës kundër sëmundjeve”, ka thënë shkencëtarja amerikane Ella Haddad, ndërsa rezultatet e studimit janë publikuar në revistën “Journal of Nutrition”.
“Ky efekt mbrojtës është i rëndësishëm për t’u parandaluar zhvillimi i sëmundjeve të ndryshme siç janë kanceri dhe sëmundjet e zemrës,” ka shtuar ajo.
Kjo është vetëm dëshmia më e re që frutat arrore janë të mira për shëndet. Arrat, për shembull, ndihmojnë në zvogëlimin e kolesterolit, ndërsa bademi është burim i shkëlqyeshëm i kalciumit për ndërtimin e eshtrave, ndërsa llojet tjera të kësaj frute ndihmojnë në parandalimin e disa llojeve të kancerit, që është vërtetuar edhe nga studimi më i ri, bën të ditur Daily Mail.