Presidenti i ardhshëm të zgjidhet nga populli

Presidenti i Kosovës, Behgjet Pacolli, ka deklaruar se ai do të jetë vetë i pari që do të kërkoj ndërprerjen e bisedimeve Prishtinë-Beograd nëse do të kërkohet të jenë temë, kufijtë e Kosovës apo ndarja e saj. “S’do të ketë ndarje të Kosovës”, ka thënë Pacolli, i cili ka folur edhe për nevojën e ndryshimit të ligjit që e bëri president.
“Ndarja e Kosovës nuk është opsion, ne do të bisedojmë me palën tjetër deri atëherë kur të jemi të respektuar prej tyre, deri në atë moment do të respektojmë dhe palën tjetër. Por në momentin që mungon respekti ndaj palës tonë, atëherë unë do të promovoj idenë që këto bisedime menjëherë të ndërpriten”, ka deklaruar presidenti Pacolli për televizionin “Albanian Screen”.

Presidenti i Kosovës përkrahë ndryshimin e ligjit të zgjedhjeve, dhe zgjedhjen e presidentit nga populli. Ai beson se do të gjendet vullneti politik për të realizuar një gjë të tillë. Ai ka thënë se Presidenti i Kosovës duhet të zgjidhet nga populli dhe se zgjedhja e presidentit nuk duhet të jetë pjesë e pazarllëqeve politike.

“Vetë zgjedhja ime si president i Kosovës, mua nuk më ka pëlqyer, sepse sigurisht ka qenë rezultat i një kontrate koalicioni prej dy apo më shumë partive. Unë do të insistoj sa më shpejtë të ketë një ligj zgjedhor që garanton që presidenti të zgjidhet nga qytetarët e Kosovës. Vetëm atëherë ai është i plotfuqishëm që të veprojë dhe të ndryshojë gjërat”.

Presidenti po ashtu shprehet i bindur që edhe referendumi duhet të jetë i sanksionuar në ligj, për të mundësuar kështu që qytetarët të kenë të drejtën e shprehjes për çështje që janë në interesin e tyre. Ai ka thënë se për të patur një Kosovë të zhvilluar që aspiron familjen evropiane, nevojitet unitet jo vetëm mes spektrit politik por edhe shoqërisë. Vetëm kështu, sipas tij, do të ecet përpara dhe do të realizohen reforma të rëndësishme dhe të nevojshme. /Telegrafi/