Rikthimi i Behramit në vendin ku u quajt "tradhtar"

Feusisberg, 23 mars - Mesfushori kosovar, Valon Behrami, do të luajë të shtunën me Përfaqësuesen e Zvicrës në ndeshjen eliminatore për Kampionatin Evropian "Euro 2012" kundër Bullgarisë. Për Behramin 26-vjeçar kjo do të jetë ndeshja e parë pas nëntë muajve mungese. Herën e fundit kur Behrami luajti për Zvicrën ishte 26 qershori i vitit 2010. Ai në ndeshjen e fazës grupore të Botërorit "Afrika e Jugut 2010" luajti vetëm 31 minuta kundër Kilit. Arbitri Al Ghamdi e ndëshkoi me karton të kuq.
"Kam jetuar nëpër shumë momente të vështira, pasi disa nuk më ndihmuan aspak pas kësaj. Tash shumë mirë e di se kush në të vërtetë më përkrah mua", tha Behrami, i cili nuk dëshiron të përmendë emra. "Njerëzit thoshin se unë e jam përgjegjës për eliminimin e Zvicrës nga Botërori. Ndjeva se ata e morën kartonin tim të kuq si diçka personale, por unë vetëm u mundova të kryeja punën time. Mendova se ai ishte Botërori i fundit për mua dhe nuk ishte aspak e lehtë ta pranoja një gjë të tillë".
Behrami është munduar ta lërë pas shpine eliminimin me aktivizim te skuadra e West Ham Unitedit, por nuk ndodhi. E përcollën shumë lëndime dhe më pas haptas tregoi se po i mungon futbolli italian. "Pati shumë faktorë negativë dhe ndihesha më mirë në jetën time private. Edhe kur luaja te West Hami nuk isha i kënaqur edhe nëse shënoja gol. Mendoja se mund të harroja zhgënjimin e botërorit brenda një muaji, por ishte shumë më e komplikuar se kaq", tregon Behrami.
Në miniafatin kalimtar Behrami mori një ofertë nga Fiorentina dhe përfundimisht iu kthye formës së tij të mëparshme. Ai pranon se Serie A është më e dobët se Premier League, por ai ndien brenda vetes diçka të bukur kur luan në këtë ligë.
"Futbolli anglez është më i miri në botë dhe më i komplikuari. Por, në Itali edhe skuadra e fundit është e zhvilluar taktikisht, gjë që nuk është në Angli", tha ai.
Behrami në çdo skuadër që ka luajtur është stabilizuar menjëherë, kurse te Fiorentina është titullar i padiskutueshëm i trajnerit serb Sinisha Mihajloviq.
"Te Fiorentina isha në gjendje të luaja sërish dhe falë kësaj u riktheva te Zvicra. Kjo ishte gjëja më e rëndësishme për mua dhe për këtë jam tepër i lumtur", shtoi Behrami. "Në Angli luaja të shtunën dhe gjatë pjesës tjetër të javës nuk ndihesh si futbollist. Në Itali presioni i mediumeve është konstant, ka shumë gjëra të këqija, por karakteri im më ndihmon shumë".
Behrami deri më tani ka zhvilluar 28 ndeshje me Përfaqësuesen zvicerane dhe ka shënuar dy gola.