“Vetëvendosje” kërkon shtyrjen e regjistrimit të popullsisë

Prishtinë, 24 mars - Lëvizja “Vetëvendosje” ka vlerësuar se regjistrimi i popullsisë parimisht është një proces i rëndësishëm, i cili shërben si bazë për planifikimin dhe zbatimin e politikave zhvillimore me karakter politik, ekonomik, social dhe kulturor. Por, duke pasur parasysh mangësitë teknike, si dhe shkaqet politike, kjo lëvizje kërkoi sot nga institucionet e vendit që të marrin vendim për shtyrjen e datës së regjistrimit të popullsisë, i paraparë të zhvillohet nga 1 deri më 15 prill.
“Nga zhvillimet e deritanishme vërehet qartë se ky proces po përcillet me probleme dhe mangësi të mëdha, si në aspektin organizativ, ashtu edhe në atë teknik. Këto probleme do të sjellin pasoja politike për shoqërinë tonë e që për Lëvizjen Vetëvendosje janë të papranueshme”, thuhet në komunikatë.
Vetëvendosje vlerëson se kur vendet e rajonit si Shqipëria, Maqedonia dhe Serbia kanë marrë vendime për shtyrje të regjistrimit të popullsisë, një gjë të tillë mund ta bëjë edhe Qeveria e Kosovës.