Kurdisja e rezultateve i dërgon në burg

Helsinki, 24 mars – Policia e Finlandës ka njoftuar sonte se ka prangosur katër futbollistë për arsye të dyshimit se vitin e kaluar kanë marrë pjesë në kurdisjen e rezultateve të ndeshjeve.

Emrat e futbollistëve të arrestuar nuk janë zbuluar për opinionin, por është njoftuar se bëhet fjalë për lojtarë të ekipeve Oulu dhe Rovaniemi, të cilat bëjnë gara në Ligën e parë të Finlandës.

Trajneri i ekipit Oulu, Juha Malinen ka thënë se dy lojtarë të ekipit të tij janë arrestuar për shkak të dyshimit se kanë marrë nga 50 mijë euro, në mënyrë që të ndikojnë drejtpërdrejt në rezultat kundër ekipit Turku. .

Numri i të arrestuarve në kuadër të hetimit për korrupsion në futbollin finlandez tashti ka hipur në 12 sish. Në mesin e të arrestuarve është edhe një shtetas i Singaporit, i cili është i dyshuar për dhënie të mitës lojtarëve.