AAK: EULEX-i të mos prek në luftën e drejtë të shqiptarëve

Aleanca për Ardhmërinë e Kosovës (AAK) të martën shprehu shqetësimin për burgosjen prej 30 ditësh të Blerim Kuçit, sekretar organizativ i AAK-së dhe kryetar i komunës së Suharekës, për shkak të refuzimit të dëshmisë për të njollosur luftën e drejtë të Ushtrisë Çlirimtare të Kosovës.
AAK ftoi EULEX-in që t’i përmbahet prioriteteve të veta për sundimin e ligjit në Kosovë dhe që të mos prek në luftën e drejtë të shqiptarëve të Kosovës për liri, demokraci dhe pavarësi.

“EULEX-i ka për detyrë të ndihmojë institucionet e Kosovës në luftën kundër korrupsionit, krimit të organizuar dhe dukurive tjera negative, që po vazhdojnë të rrezikojnë stabilitetin dhe funksionalitetin e shtetit të Kosovës. Shqiptarët e Kosovës kanë qenë pre e politikave fashiste të Serbisë së Milloshevicit, ndërsa lufta e Ushtrisë Çlirimtare të Kosovës është bërë plotësisht në mbrojtje të jetës së qytetarëve të vendit”, thuhet në reagimin e AAK-së.

Kjo parti mbështet dhe respekton qëndrimin e Blerim Kuçit në mbrojtje të vlerës së luftës çlirimtare në Kosovë.

“AAK vlerëson lartë rolin e z. Blerim Kuçi në të gjitha fazat e lëvizjes për çlirimin dhe pavarësimin e Kosovës, si gjatë protestave studentore, lëvizjes paqësore, luftës çlirimtare dhe ndërtimit të institucioneve dhe demokracisë në vend. AAK pret lirimin e shpejtë të z. Blerim Kuçi dhe kthimin e tij të fuqishëm në krye të detyrave në parti dhe në Komunën e Suharekës”, thuhet në reagim. /Telegrafi/