Myslimanët firmosin peticionin e Aleancës Kuq e zi

Qindra besimtarë myslimanë firmosën të premten peticionin e Aleancës Kuq e Zi, duke kundërshtuar hapur kërkesën për regjistrim të popullsisë mbi bazën e etnisë dhe fesë.
Imami i xhamisë së Medresesë Lulzim Plloci u shpreh kundër regjistrimit pasi, sipas tij, çdo njëri ka të drejtë të shprehet i lirë për kombësinë e fenë, por jo kur kjo gjë i imponohet.

“Ne i bashkëngjitemi kësaj nisme, pasi ky regjistrim nuk i shërben interesave të kombit tonë shqiptar. Çdokush ka lindur i lirë të shprehë kombësinë e tij, të shprehë edhe fenë e tij kombëtare, ndërsa të bëhet e detyrueshme, pra që njeriu duhet ta përmendë patjetër në këtë regjistrim, besoj që nuk është aq shumë e përshtatshme. Duke iu referuar edhe vendeve Europiane, edhe ato nuk e kanë një regjistrim të tillë”, tha Imami Plloci.

Ndërsa Kryetari i Forumit Mysliman Shqiptar Fisnik Kruja, u shpreh se nga ky regjistrim përfitojnë vetëm qarqet greke dhe kjo, sipas tij, është shumë e rrezikshme për stabilitetin e vendit./Telegrafi/