Punë për Florinin

Njëzet e dy deputetë i kanë nxjerrë punë Florin Krasniqit të Vetëvendosjes, duke e paditur për veprimtari kriminale, përfitime, përvetësim e shpëlarje parash.
Iniciativa është marrë nga Bekim Haxhiu-Kamishi. Por Krasniqi e ndien veten fitimtar, për faktin se drejtësia nuk ndahet më me alltia, por në gjykata.

Megjithatë, Krasniqi beson se është fitimtar. Nëse për asgjë tjetër, Krasniqi, dikur ish pjesëtar i ish-UÇK-së e tash deputet i Lëvizjes Vetëvendosje, triumfin e tij e shikon te ndryshimi i atyre që i përshkruan si “persona që dikur kanë vënë ligj e drejtësi me alltia, e tash i drejtohen edhe gjykatave”, njofton Express.

Kështu ai i kundërpërgjigjet një iniciative të Bekim Haxhiut, deputetit të PDK-së në Kuvendin e Kosovës, dërguar të gjitha organeve të drejtësisë vendore e ndërkombëtare, për të hetuar të kaluarën dhe veprimtarinë e tij.

Pavarësisht kësaj, Krasniqi hiç më të rëndësishme nuk i cilëson as nënshkrimet e 22 deputetëve të Kuvendit të Kosovës, që e kanë mbështetur këtë iniciativë të ish komandat Kamishit.

Në këtë rast bëhet fjalë që, përveç Prokurorisë së shtetit, asaj Speciale të EULEX-it, apo Prokurorit të Përgjithshëm të Shteteve të Bashkuara të Amerikës, Florin Krasniqi të hetohet edhe nga Zyra Federale Amerikane për Investigime (FBI).

“Kjo është një gafë e madhe publike. Ka mbetur Kamishi t’i tregojë FBI-së se kë duhet ta hetojë apo t’i tregojë se kush jam unë”, thotë Krasniqi.

Në fund të tekst-padisë së gjatë kundër Krasniqit, përmenden disa raporte ndërkombëtare për Kosovën që janë mbështetur nga Krasniqi.

Ndryshe, kjo është hera e parë që një grup deputetësh të Kuvendit të Kosovës dorëzojnë në Prokurori një kërkesë për hetim të një deputeti tjetër. /Telegrafi/