Pacolli mbetet në Qeveri

Behgjet Pacolli do të mbetet zëvendëskryeministër në kabinetin qeveritar të Hashim Thaçit.
Sipas burimeve të gazetës Express, Pacolli, së bashku me stafin e tij, janë takuar të martën me kreun e Qeverisë dhe zëvendësinë e tij, Hajredin Kuci, ku për disa orë kanë biseduar rreth disenjimit të marrëveshjes së koalicionit.

Pjesëmarrës në takim kanë pranuar se tanimë gjithcka është sqaruar dhe marrëveshja e re midis AKR-së dhe PDK-së pritet të nënshkruhet shumë shpejt.

Sipas gazetës Pacolli ia ka prezantuar shefit të Qeverisë planin e tij për postin e zëvendëskryeministrit.

“Kreu i AKR-së ka kërkuar që të ketë mbështetjen e Qeverisë dhe të kryeministrit në fushatën lobuese për njohje për Kosovën, në joshjen e investimeve të huaja dhe tema tjera qe lidhen me postin që ai pritet ta ushtrojë”, ka thënë një burim për gazetën.

Po ashtu, sipas këtij burimi, Thaci dhe Pacolli janë pajtuar që AKR-ja t’i marrë edhe dy ministri. /Telegrafi/