Wenger: Duhet të përulemi para Messit

Londër, 29 prill - Trajneri i Arsenalit, Arsene Wenger e ka definuar sulmuesin e Barcelonës si talent mental, pas dy golave që ai i shënoi në gjysmëfinale të Ligës së Kampionëve kundër Real Madridit. “Messi ka kualitete mentale që janë: përkushtimi, dëshira për të luajtur, kënaqësia për të ndihmuar ekipin, dëshirë e përhershme, e vëreni ai kurrë nuk reagon me gjithë tërë ato goditje që i japin. Kur i shihni statistikat e tij duhet të përulemi, ato janë fantastike. Kur një lojtar shënon 52 gola dhe bën 25 asistime në futbollin modern, kur e shihni sa vështirë është të shënohet një gol, atëherë duhet të jesh i bindur se ai është shumë i veçantë”, tha Wenger.

Sa i përket sjelljeve dhe reagimeve të Jose Mourinhos pas ndeshjes së humbur kundër Barcelonës, Wenger tha se e kupton reagimin e portugezit pas kësaj humbje, por nuk i jep të drejtë të minimizojë fitoren e rivalit. Sipas tij, Barcelona luan sot futbollin më të bukur në Evropë (lirisht ka mundur të thotë edhe në botë) dhe humbja kundër një skuadre të tillë nuk është turp.