Malazezët dhe kroatët do të fitojnë statusin e pakicave

Me vendim të Qeverisë dy bashkësitë etnike që nuk ishin të njohura në të kaluarën – bashkësia malazeze dhe ajo kroate, në të ardhmen do të marrin statusin e pakicave.

Zëvendëskryeministri dhe ministër i Pushtetit Lokal në Qeverinë e Kosovës, Slobodan Petrovic, ka konfirmoi se bashkësia malazeze në Kosovë do të fitojë statusin e pakicës kombëtare dhe si e tillë do të përfshihet në institucionet shtetërore kosovare.

Petrovic i ka bërë këto komente të premten gjatë një takimi në Podgoricë me ministrin për të Drejtat e Pakicave, Ferhat Dinosha.

“Dinosha ka shprehur kënaqësi për ndryshimin e statusit të bashkësisë malazeze me ndryshimet kushtetuese në Kosovë”, thuhet në njoftimin e zyrës së zëvendëskryeministrit Petrovic.

Ndryshe, Podgorica zyrtare, edhe pse e ka njohur Kosovën, nuk ka lidhur marrëdhënie diplomatike me Prishtinën, duke kërkuar që malazezët të njihen si pakicë. /Telegrafi/