Farmacistët po i “shesin” diplomatë

Disa barnatore kanë pronarë farmacistët, të cilët nuk janë të punësuar. Farmacistët i shesin licencat e tyre në të shumtën e rasteve për 200 euro. Disa farmacistë po i shesin diplomat e tyre, duke iu mundësuar blerësve të diplomave të hapin biznese, përkatësisht, barnatore.

Një farmacist, pa dashur t’i zbulohet identiteti, ka shpjeguar për Radio Kosovën se tashmë ka rënë në ujdi me një person, i cili pritet të hap barnatoren në emrin e këtij farmacisti të sapo diplomuar. I intervistuari ka thënë se këtë e ka bërë për shkak se ai nuk është i punësuar dhe se kushtet ekonomike e kanë detyruar.

“Unë si person i diplomuar në drejtimin e farmacisë, për shkak të buxhetit jo të mirë, nuk kam mundësi që ta hap një barnatore timen private dhe më duhet me shit diplomën për shkak se unë nuk i kam kushtet e mira, kështu që ai e hap barnatoren në emrin tim .Unë të kallëzova që për shkak të kushteve detyrohem të punoj për tjetër kënd”, thotë farmacisti që kërkon të mbetet anonim.

Një gjë e tillë është në kundërshtim me ligjin thotë ministri i Shëndetësisë, Ferid Agani. Por, sipas tij, kjo gjendje mund të jetë edhe pasojë e numrit të vogël të inspektorëve.

“Në qoftë se në barnatore nuk gjendet farmacisti me magjistraturë, ajo barnatore është jashtë ligjit. Kjo është prapë çështje e inspektoratit farmaceutik, i cili duhet të verifikojë në mënyrë permanente gjendjen. Në ketë aspekt kemi edhe mungesë të kuadrove të inspektoratit farmaceutik. Unë kam gjetur inspektoratin farmaceutik me katër inspektor, me një mobilizim të brendshëm të resurseve kemi arrit të kemi një ekip prej dymbëdhjetë inspektorëve farmaceutik që tash janë në terren. Kemi gjashtë ekipe nga dy inspektor ku do të monitorojnë gjendjen në ketë aspekt”, ka thënë Agani.

Vetëm dy vite më parë, një licencë e farmacistit është shitur apo është dhënë me qira për 800 euro. Këtë vit çmimi i një licence sillet nga 250 deri në 350 euro. /Telegrafi/