Televizioni shtetëror serb kërkon falje për vitet e 90-ta

Televizioni shtetëror i Serbisë, RTS, i njohur për raportimet
famëkeqe dhe të njëanshme gjatë konflikteve në Ballkan, në vitet e
90-ta, sot ka kërkuar falje te shikuesit, se ishte shfrytëzuar si mjet i
propagandës së regjimit gjatë kohës së luftës.“Me
raportimin e ngjarjeve tragjike në vitet e 90-ta, RTS, në shumë raste, i
ka lënduar ndjenjat, integritetin moral dhe dinjitetin e shtetasve të
Serbisë, të opozitës politike, të gazetarëve, të pakicave etnike dhe
fetare dhe të disa popujve dhe shteteve fqinje”, thuhet në deklaratën e
Bordit drejtues të RTS-së, njofton Radio Evropa e Lirë.
Gjatë pushtetit të ish presidentit të Serbisë, Slobodan Milosevic,
RTS-ja ishte e njohur për lojalitetin e palëkundur ndaj regjimit të tij,
ndërsa shpeshherë kundërshtarët e këtij regjimi cilësoheshin si
“tradhtarë” dhe “mercenarë të paguar nga Perëndimi”.
Bordi “kërkon falje nga shtetasit e Serbisë dhe të shteteve fqinje,
të cilat ishin objekt i fyerjeve dhe shpifjeve dhe të përmbajtjeve, që
sot mund të shihen si gjuhë e urrejtjes”, thuhet në deklaratë.
Televizioni shtetëror i Serbisë, RTS, i cili u përdor nga Milosevici
edhe gjatë luftës në Kosovë, u bombardua nga NATO në vitin 1999. /Telegrafi/