KEK-u, 24 milionë euro humbje vjetore në veri

Mungesa e qasjes së Korporatës Energjetike të Kosovës në pjesën veriore të Mitrovicës i gjeneron humbje të mëdha kësaj korporate. Vetëm gjatë një viti KEK-u humb 24 milionë euro. KEK-u, sipas zyrtarëve të saj, nga mosshtrimi i autoritetit të saj në veri humb dy milionë për çdo muaj. Këtë e ka thënë drejtori menaxhues i KEK-ut, Arben Gjukaj, të hënën në emisionin e mëngjesit në RTK. Ai ka folur edhe për investimet të cilat është duke i bërë KEK-u për t’i ulur nivelin e ndotjeve të ajrit në vend. Gjukaj ka treguar se kompania të cilën e udhëheq ai do t’i investojë së bashku me Bankën Botërore dhe Qeverinë holandeze nga shtatë milionë euro në çdo tymtarë të KEK-ut për t’i ulur ndotjet e ajrit.