Marhnac memorandum mirëkuptimi me Bllacën

Shefi i EULEX-it, Xavier de Marhnac ka hedhur firmën në një letër me Nazim Bllacën, të cilit i ka ofruar siguri maksimale edhe për disa muaj. Njeriu që pretendon se ka kryer të paktën 17 vepra penale nën ombrellën e SHIK-ut do t’i garantohet siguri nga Njësia për mbrojtje të afër deri më 14 tetor të këtij viti, por nuk përjashtohet zgjatja e këtij afati.

Marhnac dhe Bllaca kanë qartësuar të gjitha përgjegjësitë dhe obligimet e të dyja palëve që saktësohen me anë të këtij memorandumi.

Marrëveshja është nënshkruar për shkak se ndaj Nazim Bllacës që ndodhet i lirë nga fillimi i këtij viti nuk ka ndonjë masë të caktuar nga gjykata, derisa vlerësohet se dëshmitë e ofruara për “vrasje, plagosje, rrahje brutale e shantazhe” mund të bëjnë cak të ndonjë sulmi hakmarrës.

Kjo letër mirëkuptimi që përmban nëntë pika dhe dy nënpika zëvendëson të gjitha marrëveshjet gojore apo të shkruara deri tash në mes të EULEX-it dhe Nazim Bllacës.

Letra të cilën e ka siguruar Koha Ditore në versionin anglisht shkruan se njësitë policore të EULEX-it e kanë informuar Nazim Bllacën për kërcënimet e mundshme, duke i treguar udhërrëfyesin në mënyrë që t’i shmanget ndonjë sulmi të padëshiruar.

Atij i është treguar se duhet të bëjë zgjedhjen e vet nëse dëshiron të lëvizë pa mbrojtje të Policisë së EULEX-it. Nëse i ndodh diçka ai duhet t’i marrë përgjegjësitë e veta.

Ndërkaq, nga dhjetori i vitit 2009 kur policia ishte instaluar në shtëpinë e Nazim Bllacës kishte shfrytëzuar energjinë elektrike. Mirëpo tash e tutje energjinë e shpenzuar nga policët, EULEX-i obligohet ta paguajë vetë.

Nazim Bllaca nga Ribari i Madh i Lipjanit me dëshmitë e ofruara deri tash ka arritur që ta dërgojë Fahredin Gashin në gjykatë për t’u gjykuar lidhur me vrasjen e Sali Gashit më 15 qershor të vitit 1999. Ndërkohë, pjesa tjetër e grupit është ndarë nga prokuroria dhe është cilësuar si krim i organizuar. /Telegrafi/