UP-ja punëson ilegalisht

Auditori Gjeneral i Kosovës (AGJK) ka gjetur parregullsi gjatë
auditimit të pasqyrave financiare për Universitetin e Prishtinës (UP)
për vitin 2010. Gjatë auditimit është vërejtur se për kryerjen e punëve
të ndryshme, gjatë vitit 2010, UP-ja ka angazhuar edhe individë, të
cilët nuk janë në marrëdhënie të rregullt pune. Sipas raportit të
auditorit, kjo është realizuar përmes angazhimit dhe nënshkrimit të
kontratave mbi vepër.“Dhjetë kontrata mbi vepër janë në afat
të pacaktuar. Kontratat e tilla nuk janë në harmoni të plotë me ligjin
dhe rregulloret në fuqi. Përzgjedhja e kandidatëve për shërbimet
kontraktuese, që kanë të bëjnë me Universitetin Veror të Prishtinës,
është bërë me shpallje publike përmes konkursit. Gjersa për shërbimet
tjera kontraktuese nuk është ofruar asnjë shpjegim për mënyrën e
përzgjedhjes së kandidatëve”, thuhet në raport.
Sipas raportit, shumica e këtyre individëve që janë angazhuar me
kontratë mbi vepër, pas disa muajve janë punësuar përmes konkursit të
rregullt, shkruan Zëri.
Po ashtu, auditori ka vërejtur parregullsi edhe gjatë rishikimit të
shumës së paguar për ngrohje ndaj ngrohtores së qytetit “Termokos” në
vlerë prej 339,197 euro.
“Pagesat janë bërë për 18 ndërtesat e fakulteteve të UP dhe shumat sipas
muajve nuk kanë qenë të njëjta. Shumat e paguara për ngrohje dallojnë
nga muaji në muaj. Nga faturat shihet se në disa muaj nuk ka pasur
ngrohje gjatë tërë muajit dhe ditët për të cilat nuk ka pasur ngrohje
nuk janë faturuar. Megjithatë nuk ekziston asnjë dokument që sqaron
mënyrën se si bëhet përllogaritja e shumës që nuk faturohet për ditët pa
ngrohje”, thuhet më tej në raportin e auditimit.
Sipas auditorit, UP-ja nuk ishte në gjendje të ofrojë kontratë për
ngrohje me kompaninë Termokos, po ashtu UP-ja nuk ofroi raport eventual
nga kompania për shpenzimet e ngrohjes.
Auditori ka konstatuar se mungonin informatat në lidhje me hapësirat e
UP, në bazë të të cilave edhe bëhet faturimi nga kjo kompani. /Telegrafi/