Rikonfirmohet mbështetja amerikane për Kosovën

Në ditën e dytë të vizitës në Bosnjë dhe Hercegovinë, ministri i
Punëve të Jashtme i Republikës së Kosovës, Enver Hoxhaj është takuar me
ndihmëssekretarin amerikan për Evropë dhe Euroazi, Philip Gordon. Ky i
fundit ka siguruar ministrin Hoxhaj se Shtetet e Bashkuara të Amerikës
do të vazhdojnë ndihmën e pakursyer për popullin e Kosovës.Në
njoftimin për media thuhet se Hoxhaj dhe Gordon kanë diskutuar për
proceset e veçanta ndërkombëtare rreth Kosovës, dhe ndihmën e
gjithanshme që SHBA-të po japin në drejtim të përmbylljes së suksesshme
të tyre, duke filluar që nga procesi i njohjeve, anëtarësimi në
organizatat ndërkombëtare, por edhe proceset integruese të Kosovës në
strukturat euroatlantike.
Gordon ka siguruar ministrin Hoxhaj se Shtetet e Bashkuara të
Amerikës do të vazhdojnë ndihmën e pakursyer për popullin e Kosovës.
“Kosova është shtet stabil, i pavarur dhe shumetnik, dhe dialogu
teknik duhet t’i zvogëlojë diferencat në mes të Kosovës dhe Serbisë”, ka
shtuar Gordon.
Hoxhaj ka falënderuar zyrtarin e lartë amerikan për kontributin e
jashtëzakonshëm që administrata amerikane po jep për konsolidimin e
shtetësisë së Kosovës dhe forcimin e subjektivitetit ndërkombëtar të
saj. /Telegrafi/