Ilaçi që ripërtërin zemrën e dobët arrin pas 10 vjetësh

Tableta e cila shëron zemrën duke ripërtërirë indin e dëmtuar të zemrës
dhe e cila mund të përmirësoje jetën e miliona njerëzve pritet të
arrijë në barnatore për dhjetë vjet.

Shkencëtarët britanikë kanë
impresionuar me rezultatet preliminare të testimeve të ilaçit i cili do
të sanonte indin e dëmtuar të zemrës dhe vlerësojnë që ilaçi mund të
gjendet për përdorim të gjerë pas dhjetë vjetësh.

Ilaçin
parashikohet që fillimisht ta marrin pacientët me rrezik të lartë nga
sulmi në zemër në mënyrë që zemra e tyre paraprakisht të prodhojë qeliza
të reja dhe të shëndetshme kur të lindë nevoja për këtë gjë. Zbulimi më
i rëndësishëm i këtij hulumtimi shkencor qëndron në faktin që ai
“riparim” automatik mënjanon çdo rrezik që trupi do të refuzojë qelizat e
reja.

“Para pesë vitesh do të kishim thënë që kjo është
fantastikë shkencore dhe jemi shumë të entuziazmuar për këtë zbulim”,
tha profesori Peter Weissberg, kryetari i shoqërisë britanike Heart
Foundation duke theksuar se si më shumë se 750.000 britanikë vuajnë nga
zemra e dobët dhe jetojnë me rrezikun e sulmit në zemër. Më shumë se 40
për qind e pacientëve vdesin brenda vitit nga kjo diagnozë, thotë
statistika e kujdesit shëndetësor britanik.



Kupa e shenjtë e kardiologjisë

Deri
te zbulimi i ilaçit kanë ardhur shkencëtarët e Universitetit të Londrës
duke zbuluar që shtresa e jashtme e zemrës përmban qeliza të cilat
foshnjat në mitër mund t’i shndërrojnë në muskul të zemrës.

Tek
njerëzit e rritur ajo shtresë e qelizave gjendet në qetësi apo thënë
ndryshe rri kot, por kur provokohet me bashkëdyzimin e quajtur thymosin
beta-4, mund të aktivizohet dhe të fillojë zhvillimin e muskujve të
zemrës.

Në eksperimentet në minj ato qeliza kanë përmirësuar
disa nga dëmtimet në zemër, theksohet në artikullin e publikuar në
revistën “Nature reports”.

“Për ripërtëritjen e qelizave të dëmtuara të zemrës kjo është kupa e shenjtë e kardiologjisë”, tha profesor Jeremy Pearso:

”Ky
zbulim i jashtëzakonshëm tregon që edhe zemra e njerëzve të rritur
përmban qeliza të caktuara të cilat munden, nëse janë stimuluar në
mënyrë të drejtë, të mobilizojnë dhe krijojnë qeliza të reja të zemrës
të cilat janë në gjendje të ripërtërijnë zemrën e dëmtuar.”