MZHE: Privatizimi i PTK-së sipas planit

Procesi i privatizimit të Postës dhe Telekomit të Kosovës (PTK),
është duke u zhvilluar sipas strategjisë dhe planit të paraparë, bazuar
në dispozitat ligjore dhe me transparencë të plotë. Komisioni Qeveritar
për Privatizimin (KQP) e PTK-së në përputhje me vendimet e Kuvendit dhe
Qeverisë së Republikës së Kosovës, ka kryer procesin e
para-kualifikimit të ndërmarrjeve të interesuara për privatizimin e
PTK-së.Për blerjen e 75 për qind të aksioneve të PTK-së,
janë kualifikuar Hrvatski Telekom, Kroaci, kompania amë Deutche Telecom,
Gjermani dhe Telekom Austria, Austri
Procesi i vlerësimit të aplikacioneve është kryer nga një panel
profesional i përbërë nga përfaqësuesit e pesë ministrive pjesëmarrëse
në KQP.
Këshilltarët e transaksionit duke realizuar detyrat dhe obligimet e
veta në këtë proces janë në kontakt të përhershëm me përfaqësuesit e
autorizuar të kompanive të kualifikuara dhe ato janë të interesuara për
të marrë pjesë në privatizimin e PTK-së.
Komisionit Qeveritar i Privatizimit, përmes Njësisë për Implementimin
e projektit të privatizimit të PTK-së dhe këshilltarit të transaksionit
është duke përgatitur të gjithë dokumentacionin e nevojshëm për të
shpallur thirrjen për tenderim.
“Hapi tjetër në këtë proces është thirrja për propozime, gjegjësisht
oferta teknike, ku investitorëve të kualifikuar u ofrohet qasje në tërë
dokumentacionin relevant dhe u prezantohet draft marrëveshja për
shitblerjen e aksioneve me kufizimet potenciale”, thuhet në një
komunikatë për media të Ministrisë së Zhvillimit Ekonomik (MZHE).
Pas kësaj faze, kur të pranohen ofertat e tyre finale, kompanitë
ftohen të japin ofertën e tyre financiare, i cili është kriteri i fundit
për përcaktimin e tenderuesit fitues.
Procesi i privatizimit të PTK-së do të përmbyllet deri në fund të këtij viti. /Telegrafi/