Kosova përherë përkrah popullit dhe qeverisë së SHBA-ve

Me rastin e 4 Korrikut, përvjetorit të pavarësisë së SHBA-ve, Aleanca për Ardhmërinë e Kosovës ua ka përcjellë urimet më të përzemërta, ambasadorit amerikan në Kosovë, Christopher Dell, stafit diplomatik, ushtarëve amerikanë të KFOR-it, Qeverisë së SHBA-ve dhe mbarë popullit amerikan.

Në urim thuhet se Dita e Pavarësisë së SHBA-ve është moment i festës jo vetëm për popullin amerikan, por edhe për popullin dhe Republikën e Kosovës dhe të gjithë popujt paqedashës dhe demokracinë në botë.

“Në këtë ditë, ne, duke ndarë gëzimin me popullin amerikan, përcjellim edhe një herë mirënjohjen dhe falënderimin tonë për të gjithë mbështetjen që SHBA-të i kanë dhënë popullit dhe vendit tonë në rrugën e vështirë për dinjitet, liri dhe pavarësi kombëtare e qytetare. Kosova dhe populli i Kosovës do të jenë përherë përkrah popullit dhe qeverisë amerikane në projektin dhe vizionin madhor për liri, paqe e demokraci të popujve kudo në botë”, thuhet në urimin e AAK-së. /Telegrafi/