LDK: Qeveria kundër Universitetit të Prizrenit

Universiteti i dytë publik në vend, Universiteti i Prizrenit, që nga fillimi i punës është pa asnjë përkrahje nga Qeveria e Kosovës. Ai u themelua nga Qeveria dhe vendimi nuk u ratifikua asnjëherë nga Kuvendi i Kosovës, theksuan përfaqësues të Lidhjes Demokratike të Kosovës.

Sipas LDK-së, Ministria e Arsimit, Shkencës dhe Teknologjisë e në radhë të parë ish-ministri Hoxhaj është sjellë me këtë universitet si me një pronë private, duke e shfrytëzuar atë për akomodimin e njerëzve të PDK-së dhe të njerëzve përreth ish-ministrit.

Në një vit ekzistencë, Universiteti p Prizrenit nuk është përkrahur financiarisht, është lënë pas dore në planin e zhvillimit profesional, rektori gjerman i tij është parë si kundërshtar politik, meqë ai nuk u soll si njeri i PDK-së, siç kërkon Qeveria.

“Akti i fundit kundër këtij universiteti është refuzimi i konkursit publik, të shpallur ditë më parë nga rektori e të anuluar dje nga Qeveria. Me këtë Qeveria provon edhe një herë se nuk ka një program për këtë universitet, se nuk siguron fonde për të, meqë nuk mendon për të. Kryeministri e pati shpallur Universitetin e Prizrenit universitet të shekullit XXI, ndërsa tani Qeveria e tij e pengon punën e këtij universiteti dhe e shantazhon rektorin në secilin veprim që ndërmerr ai”, thuhet në komunikatë.

Lidhja Demokratike Kosovës kërkoi që të zbatohet Ligji për Arsimin e Lartë dhe normat ligjore të Universitetit të Prizrenit.

Po ashtu u kërkua që të lejohet ky universitet të zhvillohet dhe Qeveria të heq dorë nga ndërhyrjet politike dhe ndërhyrjet e natyrave të tjera, me të cilat po pamundëson punën e këtij institucioni të ri universitar. /Telegrafi/