Prilluzha në barrikadë!

Serbët e Prilluzhës së Vushtrrisë, të pakënaqur për ndërtimin e urës mbi lumin Sitnicë, kanë paralajmëruar se sot do të bllokojnë sheshin e ndërtimit.
Banorët janë të pakënaqur për ndërtimin e urës që do t’i lidhë fshatrat në të cilat jetojnë shqiptarët. Ata kanë vendosur ta marrin këtë hap, sepse siç thonë, bisedat me komandantin e KFOR-it, Erhard Buhler, “nuk ishin të frytshme”.

Buhler u ka thënë serbëve se ai nuk është në gjendje ta ndaloj ndërtimin e urës, por se për shkaqe të sigurisë do të ofrojnë prani të përhershme të KFOR-it në këtë rajon.

Nënkryetari i komunës paralele serbe të Vushtrrisë, Miodrag Stolic, ka thënë për “B92” se “kanë frikë për siguri”, duke përkujtuar se “përderisa ishte ura në funksion, kanë pasur probleme me shqiptarët”.

“Ne jemi të vetëdijshëm për faktin se ai (Buhler) është angazhuar personalisht për ndërtimin e urës. Motivet e vërteta të tij ne nuk i dimë, por ndoshta do ta marrim vesh. Planet tona të ardhshme janë demonstrimet e qeta, duke tentuar të ndalojmë ardhjen e makinerisë së madhe të ndërtimit tek ana jonë e lumit. Konfiguracioni i terrenit është i tillë që nuk mund të ndikojmë në ndërtimin e lumit nga ana tjetër. Ne veç tash po kemi provokime dhe incidente, e ai (Buhler) na flet për njëfarë bashkëjetese me shqiptarët e këtyre fshatrave”, ka thënë Stolic. /Telegrafi/