Ministria e Punëve të Jashtme dënon dhunën në Siri

Ministria e Punëve të Jashtme e Republikës së Kosovës po i përcjellë me vëmendje dhe shqetësim zhvillimet e fundit në Siri.

Qeveria dhe populli i Kosovës përkrahin përpjekjet e popullit të Sirisë për liri dhe demokraci.

“Republika e Kosovës i bashkohet shteteve demokratike në kundërshtimin e dhunës dhe represionit ndaj protestuesve sirianë. Presidenti Bashar al-Assad me aktet represive dhe dhunën e ushtruar ndaj qytetarëve të shtetit të tij, tashmë ka humbur të drejtën për të qeverisur vendin”, thuhet në një kumtesë të lëshuar nga MPJ.

Qeveria e Kosovës bën thirrje për ndalimin e dhunës ndaj protestuesve paqësor në Siri dhe mbështet fuqitë e mëdha demokratike në angazhimin për ofrimin e përkrahjes për popullin sirian, në tejkalimin e kësaj situate dhe realizimin e synimeve dhe aspiratave për liri dhe demokraci. /Telegrafi/