S’ka më ‘edhe Kosova, edhe BE-ja’

Kryetari i Partisë Demokratike Serbe (DSS), Vojislav Kostunica, ka vlerësuar të mërkurën se pas vizitës së kancelares Angela Merkel Beogradit është e qartë se Kosova është “çmimi” për hyrjen e Serbisë në Bashkimin Evropian.

“Qëndrimet që i ka paraqitur kancelaria ashiqare paraqesin kërkesën e BE-së që Kosova, përkatësisht tërheqja e tërësishme e shtetit të Serbisë nga ‘krahina e vet jugore’, është kushti qenësor për integrime evropiane. Tashmë asnjë politikan në Serbi nuk mund ta kthejë kokën dhe të bëhet sikur nuk e kupton se Serbisë i është paraqitur kërkesa që hyrjen në BE ta paguajë me territor të vetin”, ka thënë Kostunica për agjencinë Beta, raporton Koha.

“Do të ishte papërgjegjësi e skajshme që të vazhdohet me tregimin bajat ‘Edhe Kosova edhe BE’, sepse kushtet që i ka paraqitur Gjermania nuk mund t’i ndryshojë askush dhe këto kushte në fakt vlejnë që nga viti 2008, kur shumica e vendeve të BE-së në mënyrë të kundërligjshme njohën shpalljen e njëanshme të pavarësisë së Kosovës”, ka shtuar ai.

Kostunica ka theksuar se DSS mendon që Serbia “qetësisht dhe qartë duhet të kumtojë se nuk do ta paguajë hyrjen në BE me territorin e vet”. “Është koha që Serbia t’i kthehet vetes dhe zhvillimit të vet, kurse qëllim primar duhet të jetë bashkëpunimi me shtetet e tjera mbi baza të barabarta, e jo hyrja në BE”, ka vlerësuar ky politikan i djathtë serb. /Telegrafi/