Ngatërresa e Ramiqit për “shaminë”

Përpos në rrugë, drejtuesi i organizatës “Bashkohu”, Fuad Ramiqi, në ditën e parë të mësimit ka dalë edhe nëpër shkollat e kryeqytetit. Ai ka shoqëruar dy vajza në shkollën Fillore "Hilmi Rakovica" në Prishtinë, të cilat nuk janë lejuar nga drejtori i kësaj shkolle të vijojnë mësimin, pasi ishin të mbuluara me shami.

“Çka do që të na sjellë ligji, unë do ta zbatoj. Nëse nesër bëhet ligji, nesër do ta zbatoj ", i ka thënë Ramiqit drejtori i shkollës, Ajet Brajshori, duke i kërkuar atij që ta lirojë hyrjen e shkollësraporton KTV.

Megjithatë, diskutimi në mes tyre është ashpërsuar dhe ka zgjatur afro 20 minuta, madje me tone kërcënuese. “Shumë i vogël je ti të kërcënosh, ti qenke burrë i ligë", i ka thënë drejtorit një person tjetër, që ka shoqëruar Fuad Ramiqin. “Kërcënimit i ka kaluar koha dhe nuk kemi nevojë për gjëra të tilla. Ne jemi të thirrur ta zbatojmë ligjin dhe këtë do të mundohemi ta bëjmë”, është përgjigjur drejtori Brajshori.

Ndërkohë, ministri i Arsimit, Ramë Buja, e ka bërë të qartë se mësimi për fenë dhe shaminë duhet të zhvendoset në vende të tjera, e jo në shkollat publike. “Si ministër, mbase, mendoj se në shkolla publike është e panevojshme. Kushtetuta dhe ligjet e parashohin shumë qartë se ku duhet të mësohet feja“, ka thënë Buja në një intervistë për emisionin “Interaktiv“ të KTV-së.