Vetëvendosje: Qeveria po e varros demokracinë

Ngjarjet që ndodhën gjatë seancës më 31 gusht 2011 në Kuvendin e
Republikës së Kosovës mund të quhen varrosje e demokracisë. Dhe kjo, si
për ironi, ndodhi pikërisht në Kuvend, brenda institucionit që do të
duhej të ishte shembull i demokracisë, thanë anëtarët e Lëvizjes
“Vetëvendosje!” në konferencën e sotme për shtyp. Dje u
votua për amandamentet e Ligjit për të Pagjeturit, të propozuara nga
deputetja e Lëvizjes, Albana Gashi. Fillimisht me 39 vota për, e 32
kundër, 5 amandamentet e propozuara u miratuan në Kuvend.



“Por, meqë këto amandamente po e cenonin multietnicitetin ahtisaarian
të Hashim Thaçit, u mobilizua vetë kryeministri për t’ua ndryshuar
vullnetin deputetëve të cilët votuan pro amandamenteve. Pas pushimit
dyorësh, kur filloi pjesa e dytë e seancës, deputetja Emilja Rexhepi u
shfrytëzua për ta dorëzuar një kërkesë për rishqyrtimin e votimit, meqë
pretendoi se ajo - së bashku me një koleg tjetër deputet - kishin votuar
gabimisht pro amandameneve në fjalë. Fakti që ajo ka qenë e manipuluar
dhe është shfrytëzuar për ta dorëzuar kërkesën e saj formale vetëm sa
për ta nxitur rivotimin, tregon votimi i saj i dytë i cili është i
njëjtë – pra ajo edhe herën e dytë votoi për amendamentet”, thuhet në
kumtesën e Lëvizjes për shtyp, sipas së cilës deputetët të cilët e
ndërruan votën e tyre nga për në kundër janë 4 të PDK-së, një i LDK-së
dhe një nga BSDAK.

“Kjo praktikë antidemokratike duhet ta shqetësojë thellësisht
popullin e Kosovës, meqë këtu kemi të bëjmë me një pushtet që
legjitimitetin e grabit me kërcënime, klientelizëm e para; i cili
autoritetin e tij e shfrytëzon për t’ia rritur vetes fuqinë dhe pasurinë
personale; dhe i cili këtë pasuri e fuqi të rritur në mënyrë të
paligjshme e shfrytëzon në dëm të interesit të qytetarëve të Kosovës dhe
për ta mbytur demokracinë”. /Telegrafi/