Blair dhe Holbrooke nderohen nga KKSHA

Këshilli Kombëtar Shqiptaro-Amerikan, do të nderojë këtë muaj me mirënjohjet kryesore dy ish-burrështetasit anglo-amerikanë, që me angazhimin dhe veprimin e tyre ndihmuan paqen në Ballkan dhe në veçanti paqen dhe lirinë e Kosovës.

“Këtë vit KKSHA nderon ish-kryeministrin britanik Tony Blair me mirënjohjen ‘Duart e Shpresës’, për kontributin e tij historik që çoi në pavarësinë e Kosovës”, transmeton “RTK” njoftimin.

KKSHA do të kujtojë dhe nderojë edhe jetën e ambasadorit Richard Holbrooke, për rolin e tij si i dërguar i posaçëm i presidentit, për ‘kurajën e jashtëzakonshme diplomatike për të sjellë paqen për popujt e Ballkanit”.

Holbrooke vdiq dhjetorin e kaluar, ndërsa mirënjohjen për “Arritje Jetësore” do ta marrë ambasadori Frank Wisner.

Programi i sivjetshëm i KKSHA do të shënojë edhe njëzetvjetorin e rivendosjes së marrëdhënieve diplomatike midis SHBA dhe Shqipërisë.

Në këtë mbrëmje pritet të marrin pjesë udhëheqës shtetërorë dhe politikë nga Shqipëria, Kosova dhe vendet e tera të banuara me shqiptarë në Ballkan. /Telegrafi/