VV: Marrëveshja, vulos zmbrapsjen e Thaçit

Me marrëveshjen e fundit me Borislav Stefanovicin, Edita Tahiri vulosi zmbrapsjen e Hashim Thaçit nga veriu i Kosovës. Edita Tahiri me këtë marrëveshje vulosi dështimin e maskaradës së quajtur “reciprocitet” që realisht nuk u implementua asnjëherë. Ajo e vulosi kthimin në gjendjen para 25 korrikut. Kështu kanë deklaruar të dielën përfaqësues të Lëvizjes “Vetëvendosje” në një konferencë për media që u mbajt një ditë pas arrestimit të aktivistëve të kësaj lëvizjeje.
“Bojkotimi i mallrave të Serbisë duhet të lidhet me njohjen e pavarësisë së Kosovës nga Serbia, kërkimfaljen dhe pagimin e dëmeve të luftës, kthimin e trupave të pagjetur, dorëzimin dhe dënimin e mijëra kriminelëve etj.,etj., dhe jo me njohjen e ca vulave ku as nuk shkruan Republika e Kosovës. Në kohën kur strukturat ilegale të Serbisë janë forcuar, kur policët e Kosovës plagosen e vriten në veri, kur Tadic refuzon shpërbërjen e strukturave ilegale edhe pas kërkesës së kancelares Merkel, vazhdimi i bisedimeve me Serbinë është i palogjikshëm dhe shumë i dëmshëm për Kosovën”, ka thënë Xhelal Sveçla, anëtar i “Vetëvendosje”.

Nga ana tjetër, Albana Fetoshi ka theksuar se Serbia i ka pranuar vulat doganore, sepse në emërtimin e tyre nuk e kanë fjalën Republikë.

“Pikërisht në këtë pikë është kundërshtimi i vërtetë i Serbisë, pra te Republika e Kosovës. Dihet që Serbia e pranon Kosovën që nuk i thotë vetes Republikë. Pra, ajo i pranoi vulat pa mbishkrimin Republika e Kosovës në to”, është shprehur Fetoshi.

Lëvizja e ka akuzuar Qeverinë e Kosovës dhe policinë për, siç thonë ata, dhunën e ushtruar ndaj pjesëtarëve të saj gjatë arrestimit.

Lëvizja “Vetëvendosje” të shtunën ka organizuar një aksion protestues kundër zëvendëskryeministres Edita Tahiri duke hedhur domate kundrejt automjetit zyrtar të kryenegociatores në bisedimet me Serbinë pas kthimit të saj nga Brukseli, ku ajo kishte mbajtur takimin e radhës me Borko Stefanovicin. /Telegrafi/