Kurti: Bisedimet, në dobi të palës serbe

Kreu i Lëvizjes Vetëvendosje, Albin Kurti, është shprehur sërish kundër bisedimeve ndërmjet Kosovës me Serbinë. Ai ka thënë se bisedimet pa kushte me Serbinë janë të dëmshme për Kosovën dhe se nga kjo do të përfitojë vetëm pala serbe.

Lëvizja Vetëvendosje të shtunën ka mbajtur mbledhjen e Këshillit të Përgjithshëm, ku në rend dite ishte prezantimi i aktiviteteve të Vetëvendosjes dhe strategjia e veprimit për të ardhmen të këtij subjekti parlamentar.

Në fjalën e tij hyrëse lideri i Vetëvendosjes, Albin Kurti, ka thënë se me kritikën dhe idetë e saj kjo lëvizje po ia kthen historinë politikës dhe politikën historisë.

Ai edhe njëherë tregoi se sa të dëmshme janë për vendin bisedimet, të cilat po zhvillohen me palën serbe në Bruksel.

“Sa më shumë që po bisedohet me Serbinë aq më shumë po humbim territor dhe aq më tepër jo funksional po bëhet shteti ynë”, u shpreh Kurti.

Kurti nuk la pa përmendur edhe kontratën e Qeverisë së Kosovës me kompaninë “Bektel Enka” për autostradën Vërmicë-Merdare, derisa bëri fajtorë qeveritarët se me nënshkrimin e saj ata “po i lajnë borxhet e tyre me paratë e popullit”. /Telegrafi/