Limaj u paraqit në Gjykatën e Qarkut

Deputeti Fatmir Limaj pak çaste më parë është paraqitur në Gjykatën e Qarkut në Prishtinë, ku ka nisur seanca paraprake që, sipas burimeve të Kohës Ditore, mund të përfundojë me nxjerrjen e një vendimi për t’i shqiptuar atij arrest shtëpiak ose paraqitje në polici.

Burimet kanë thënë se kjo është bërë si kompromis për të mos u arrestuar Limaj, menjëherë pas publikimit të aktgjykimit për imunitetin nga ana e Gjykatës Kushtetuese.

Koha Ditore ka raportuar se tw enjten (sot) do të shpallet aktgjykimi dhe do të hyjë në fuqi menjëherë, ndërsa deputeti Limaj ka një urdhërarrest për “rastin Kleçka”.

Aktgjykimi do të përmbajë edhe interpretimin se deputetët mund të arrestohen dhe ndalohen pa pasur nevojë t’iu hiqet imuniteti për aktivitete jashtë fushëveprimit të tyre. /Telegrafi/