Krasniqi vendos për karrigen e Konjufcës

Karrigia e Glauk Konjufcës si nënkryetar i Kuvendit të Kosovës është në “duar” të Jakup Krasniqit si kryetar i Kuvendit të Kosovës, shkruan sot Koha Ditore.

Në bazë të Rregullores së Kuvendit të Kosovës, Krasniqit i takon fjala e fundit nëse nënkryetar i Kuvendit do të vazhdojë të jetë Glauk Konjufca apo do të bëhet dikush nga Aleanca për Ardhmërinë e Kosovës, tash kur “Vetëvendosje” nuk i ka më katërmbëdhjetë deputetë në Kuvend si në shkurt të këtij viti kur ka qenë bashkë me Lëvizjen për Bashkim e që Konjufca ishte zgjedhur nënkryetar, por i ka dymbëdhjetë po aq sa ka edhe AAK-ja.

Në bazë të Rregullores së Kuvendit të Kosovës, kreut të pestë të saj, që flet për kryetarin e Kuvendit, përkatësisht neni 17 që tregon për përgjegjësitë e tij, në pikën 1 thotë: “Kryetari e bën interpretimin përfundimtar të Rregullores gjatë mbledhjes plenare”.

Gazeta ka provuar të shtunën të marrë një qëndrim nga kryetari i Kuvendit të Kosovës, Jakup Krasniqi, por një gjë e tillë ka qenë e pamundur.

Në bazë të Rregullores së Kuvendit të Kosovës, nga një funksion i kryetarit të Kuvendit u takon tri forcave më të mëdha parlamentare. Kjo rregullore në kreun e tretë të saj, ku flet për konstituimin e legjislaturës së Kuvendit, përkatësisht neni 12 ku udhëzon për zgjedhjen e kryetarit dhe nënkryetarëve të Kuvendit, në pikën 3 thotë: Kryesuesi i mbledhjes konstituive të legjislaturës kërkon nga tri grupet më të mëdha parlamentare ta propozojnë nga një kandidat për nënkryetar të Kuvendit, të cilët zgjidhen me shumicën e votave të deputetëve të Kuvendit.

(Tekstin e plotë e gjeni sot në gazetën Koha Ditore)