Ironia e ministrit Rexhepi

Serbët në pjesën veriore po bashkëjetojnë me barrikadat. Ata po pinë raki dhe po organizojë ahengje familjare përreth telave me gjemba. Por, atje nuk mungon as rivaliteti mes banorëve, që shpesh përfundon më të shtëna.

Serbët vazhdojnë të mbajnë rrugët e bllokuara duke hedhur zhavor, gurë dhe mjete të tjera, derisa natën bëjnë roje në tentim për të mos lejuar përpjekjet e ushtarëve të KFOR-it për të hapur rrugët.

Zyrtarë të KFOR-it tashmë kanë bërë të ditur se nuk do të përdorin dhunë për zhbllokimin e rrugëve, derisa serbët të jenë paqësorë në veprimet e tyre.

Pavarësisht “qetësisë” që është duke mbretëruar në atë pjesë, nuk kanë munguar edhe telashet mes vetë serbëve.

Jeta në barrikada e ka edhe anën zbavitëse. Mediat serbe kanë njoftuar për një dasmë të pazakontë në veri. Sipas Radiotelevizionit të Serbisë, familja Radivojevic nga Leshaku ka bartur gazmendin familjar nga shtëpia në barrikada. Për argëtim kanë shërbyer turmat derisa rakia u është ofruar edhe ushtarëve të KFOR-it përtej telave me gjemba, të cilët raportohet se kanë refuzuar me mirësjellje të pinë.

E tërë kjo situatë komentohet sërish me ironi nga Ministri Rexhepi.

“Këtu në Mitrovicë, a e di çka po thonë për barrikadat: Si në Big Brother janë ba veç me ua qit edhe do kamera edhe me këqyr show se çka po bëjnë”, ka thënë Rexhepi, raporton “Express”.

Për serbët në veri, një thirrje ka ardhur nga Presidenti Boris Tadiq. Duke folur në New York për mediet serbe, ai ka kërkuar “që qytetarët e nacionalitetit serb në veri të Kosovës dhe në përgjithësi në Kosovë të rrinë të qetë dhe të jenë të durueshëm”.

Ministri Rexhepi e ka komentuar me sarkazëm deklaratën e Tadiqit.

“Nëse rrihen ndërmjet veti, duhet me kërku qetësi sepse po ia nisin me hangër shoqi-shoqin”, ka thënë Rexhepi.