Përpjekjet kundër rrjedhës së naftës do të vazhdojnë për disa muaj

Roja Bregdetare amerikane thotë se përpjekjet për të penguar përhapjen e rrjedhës së naftës në Gjirin e Meksikës duket se do të vazhdojë për disa muaj.
Përmes disa intervistash të dielën, admirali Thad Alled tha se kapuçi i instaluar javën e kaluar mbi të çarën e depozitës që rrjedh naftë po mbledh vetëm një pjesë së lëngut të zi. Ai tha se shpimet e tjera përqark depozitës për të çliruar rrjedhën, nuk do të jenë gati deri në gusht.

Që nga shpërthimi i platformës pluskuese që kontrollonte pusin e naftës në brigjet e Luizianës me 20 prill duke vrarë 11 punonjës, kompania energjetike BP ka dështuar në një numër përpjekjesh për të futur nën kontroll rrjedhën.

Zyrtarët e BP thonë se pajisja në formën e një kapeleje e instaluar javën e kaluar po mbledh më shumë se 10 mijë fuçi nafte në ditë. Por zyrtarët përllogarisin se rreth 19 mijë fuçi naftë po rrjedhin çdo ditë nga e çara në fund të detit. Përllogaritjet variojnë rreth volumit total të naftës së derdhur në det.

Ndotja nga nafta është përhapur në mbarë Gjirin e Meksikës, duke mbuluar zogjtë dhe botën tjetër të gjallë dhe duke kërcënuar të shkatërrojnë industrinë e peshkimit të atij rajoni. /VoA/