Liqeni i Shkodres
Rënia e nivelit të ujërave për shkak të mungesës së reshjeve, si dhe
shtimi gjithnjë e më shumë i sipërfaqes moçalore, të ofrojnë një pamje
trishtuese të tij. E ndërsa sipërfaqet e tjetërsuara të liqenit më të
madh në Ballkan shtohen, asgjë nuk bëhet për ta shpëtuar atë nga
degradimi i plotë. Statusi i zonës së mbrojtur dhe përfshirja në
Konventën Ramstar, duket se nuk kanë shërbyer për mbrojtjen e ujërave të
këtij liqeni. Derdhja për vite të tëra i ujërave të zeza të qytetit të
Shkodrës, ka shkaktuar një dëm të pallogaritshëm. Përmasat e këtij dëmi
duken qartë në këtë fillimvjeshtë, megjithë shirat e ditëve të fundit
nuk ka arritur që të ndryshojë pamjen e një vere tejet të thatë.
Aktualisht, zona moçalore e kënetës është zgjeruar që nga molo në rrugën
hyrëse të qytetit të Shkodrës deri në afërsi të pikës turistike të
Shirokës. Era e keqe që kundërmon gjithandej të shpon hundët, ndërsa
mizat dhe insekte të tjera të shoqërojnë gjatë gjithë orëve të ditës.
Niveli i ndotjes së liqenit sa vjen dhe rritet jo vetëm nga derdhja e
ujërave të zeza në të, por edhe nga grumbujt e stërmëdhenj të
mbeturinave që gjenden në brigjet e tij. Akoma nuk ka një studim të
plotë të botuar në lidhje me shkallën e ndotjes së liqenit dhe
shkaktarët kryesorë të kësaj ndotjeje, kjo pasi në Shkodër mungojnë
laboratorët e duhur për të bërë analiza të tilla. Një pjesë e
përfaqësuesve të shoqatave mjedisore që operojnë në Shkodër shprehen se,
lokalet e shumta të ndërtuara gjatë gjithë gjatësisë së bregut të
liqenit të Shkodrës janë ndotësit kryesorë të tij, përdorimi i gropave
septike bën që këto ujëra të derdhen në liqen, gjë e cila ka ndikuar në
rritjen e nivelit të ndotjes së liqenit.
Por ka edhe përfaqësues të tjerë të shoqatave mjedisore që pohojnë se
ndotësit kryesorë janë mbetjet e uzinës së përpunimit të aluminit në
Podgoricë. Madje në disa seminare me gjysmë zëri një fakt i tillë është
pohuar edhe nga përfaqësues të Ministrisë së Mjedisit të shtetit fqinj
në Shkodër. Por përderisa akoma edhe sot nuk ka një raport të saktë
zyrtar për shkallën dhe përbërësit kryesorë të kësaj ndotjeje, nuk mund
të merren të mirëqena pohimet e specialistëve të këtyre shoqatave
mjedisore. Megjithëse herë pas here, drejtuesit lokalë në Shkodër kanë
deklaruar se po merren masa për mbrojtjen e liqenit, por indiferentizmi
dhe keqpërdorimi i tij sa vjen dhe bëhet më i dukshëm.
Postime
Titulli: Liqenet ne Evrope 
Fri Jun 11, 2010 7:43 pm
