Diplomatët e BE-së, mbledhje për krizën shqiptare

Luksemburg, 12 qershor - Ministrat e jashtëm të vendeve anëtare të Bashkimit Evropian, më në krye shefen e diplomacisë evropiane, Katherine Ashton, pritet të hartojnë të hënën një deklaratë të prerë për zgjidhjen e krizës shqiptare.

Në agjendën e mbledhjes së Këshillit të Jashtëm, që do të mbahet më 14 qershor në Luksemburg, theksohet se Këshilli do të diskutojë për situatën politike në Shqipëri në sfond të përpjekjeve lehtësuese të nismës së ndërmarrë nga krerët e dy grupeve parlamentare të PPE-së dhe PSE-së, Daul dhe Schulz, të cilët janë mbështetur nga Përfaqësuesja e Lartë e BE-së, Katherine Ashton dhe komisionari Fule.

Këshilli pritet të diskutojë dhe të mirëpresë rezultatet e takimit të nivelit të lartë ndërmjet BE-së dhe Ballkanit Perëndimor në Sarajevë, më 2 qershor nën drejtimin e ministrit të Jashtëm të Spanjës Moratinos.