Edhe një mbledhje rutinë për Kosovën në KS të OKB

Këshilli i Sigurimit (KS) i OKB-së debatoi të enjten mbrëma sipas kohës sonë për Kosovën. Ministri i Jashtëm serb, Vuk Jeremic, ashtu siç pati paralajmëruar edhe më parë, ka shtruar kërkesën për krijimin e një komisioni të posaçëm hetimor lidhur me pohimet e Dick Martyt për trafikimin e organeve njerëzore gjatë luftës çlirimtare në Kosovë.
Kësaj radhe kryediplomati serb ka shkuar edhe më larg, duke thënë se EULEX-i duhet të veprojë me vendosmëri kur është fjala për ish-ministrin e Transportit dhe Postë-Telekomunikacionit, Fatmir Limaj.
“Limaj ende injoron përpjekjet e EULEX-it për arrestimin e tij dhe vazhdon të jetë i lirë”, ka thënë Jeremic, në kuadër të raportimit tremujor për Kosovën në këtë mekanizëm.
Ndërkaq, nga ana e tij, Ministri i Jashtëm i Kosovës, Enver Hoxhaj ka thënë se Kosova është e përkushtuar për bashkëpunim rreth hetimit lidhur me akuzat për trafikimin e organeve njerëzore, si dhe se është e gatshme te gjejë mënyra të reja për përmirësimin e marrëdhënieve me Serbinë dhe se ky vend duhet të pajtohet me realitetin e ri për Kosovën shtet i pavarur.
Siç raporton Zëri, ministri Hoxhaj ka shtuar se institucionet e Kosovës nuk do të lejojnë elemente ekstreme për të penguar zhvillimin e Kosovës, por të njëjtën gjë e ka kërkuar edhe nga Serbia sa i përket elementeve radikale që veprojnë në veriu e Kosovës.
Duke folur rreth deklarimeve të Vuk Jeremic, ministri Hoxhaj ka theksuar se ai nuk i njeh faktet në terren, pasi që Kosova ka punuar për t’i përmbushur nevojat e komuniteteve pakicë. “Kosova është një shtet i ri, stabil, dinamik, që ofron mundësi dhe shanse të barabarta për të gjithë shtetasit e vet”, ka thënë Hoxhaj. /Telegrafi/