Kamera uebi për HD

Sot krejt çka ka lidhje me video duhet të jetë HD, prandaj aftësi të tilla priten edhe nga kamerat e uebit. Në lidhje me këtë janë përgjigjur edhe nga Logitech me modelet e veta të reja.
Kompania Logitech ka rifreskuar ofertën e vet të kamerave të uebit, e në fokus të këtij rifreskimi në të gjitha modelet ka qenë incizimi me rezolucion HD (high definition).

Modeli i parë është HD Pro Webcam C910 i cili mund të incizojë në rezolucion prej 1080p. Video bisedat në këtë rezolucion nuk janë të mbështetura, mirëpo ato janë të mundura në rezolucion 720p. Për përmirësimin e kualitetit të zërit është bërë përgjegjës mikrofoni stereo, e fotografitë mund të bëhen me rezolucion prej 10 megapiksela.
HD Webcam C510 incizon “vetëm” me 720p, fotografitë me tetë megapiksela, e falë dizajnit i cili paloset, ajo është shumë e lehtë për t’u bartur. Rangut më të ulët i takon modeli HD Webcam C310 i cili mund të incizojë video me rezolucion 720p, mirëpo fotografitë janë kufizuar në pesë megapiksela.




Çmimet e rekomanduara të shitjes për tregun amerikan janë 100, 60 e 50 dollarë, me radhë për modelet C910, C510 dhe C310.